Venres, 5 de xuño
Hoxe imos repasar os instrumentos de percusión da nosa aula, e aprenderemos a clasificalos por familias.
E para rematar, cantaremos e bailaremos con "A canción da percusión" de Olga Brañas.
Venres, 29 de maio
A tarefa desta semana consistirá en construír un instrumento musical.
Na páxina principal do blog déixovos varios videos dos que podedes coller ideas.
Despois de construír o voso instrumento pedídelle a mamá e papá que lle saquen unha foto e mandádesma.
Ah!
e gardade o instrumento para cando voltemos ao cole, porque os
clasificaremos por familias e faremos unha exposición con todos eles.
E para cantar e bailar hoxe déixovos unha canción moi divertida sobre instrumentos musicais "A miña tía" de Mamá Cabra. Agardo que a desfrutedes!
Venres, 22 de maio
Bo día nenos e nenas!
Hoxe imos xogar ás adiviñas de cancións.
Espero que vos guste! Unha aperta grande.
Venres, 15 de maio
Bo día! Estamos na Semana das Letras Galegas, este ano adicadas a Ricardo Carvalho Calero.
Por iso, imos empezar a clase cantando e bailando ao ritmo da canción "Queremos galego" de Pablo Díaz.
Facer baile libre nas estrofas e repetir sempre a mesma coreografía no retrouso (por exemplo, facer os xestos alusivos a "terra"= sinalar coas dúas mans cara o chan, "ceo"= sinalar coas dúas man cara arriba, "beira do mar"= indicar coas mans cara adiante, e "xa" = dedo indice sinalando cara adiante; ou outros que se vos ocorran). Podedes envíarme o vídeo a: lardeira78@gmail.com
Logo de tanto movemento, imos voltar á calma co conto-canción "A bruxa Maruxa". Despois, tedes que facer un debuxo da bruxa Maruxa. A ver que bruxiñas máis bonitas debuxades!
Agardo que desfrutedes coas propostas. Na páxina de inicio tedes máis cancións para cantar e bailar en galego. Feliz día das Letras! Unha forte aperta para todos os nenos e nenas.
Venres, 8 de maio
Bo día nenos, nenas e familias!
Hoxe imos empezar as propostas recordando unha canción que traballamos na aula: "Que ricos os bicos". Gustáballes moito, a ver se a lembran.
É unha canción na que faciamos baile libre e cando na canción di "un bico na....(unha parte do corpo)" parabámonos e, coa man, dabamos un bico nesa parte.
A segunda proposta é unha canción-xogo de entrenamento rítmico; "Bim Bum" para realizar con percusións corporais.
A maioría dos pequenos/as aínda non facían os chasquidos dos dedos, polo que os imos substituir por un lixeiro toque da cabeza coas xemas dos dedos.
A velocidade do tempo vai aumentando, se chegamos ao final, estupendo, e se non, non pasa nada! O importante é desfrutar acompañando a canción.
Se queredes, podedes facerlles unha pequena gravación e enviarma.
Venres, 24 de abril
Onte celebrouse o día do libro, polo que as propostas de hoxe van ser as seguintes:
1. Cantar e bailar coa canción "O libro máxico" de Migallas.
2. Practicar, con palmas ou algún instrumento de percusión que teñades na casa, o ritmo de palmas que soa no retrouso da canción "O libro máxico".(O ritmo repítese 8 veces)
No hay comentarios:
Publicar un comentario